అమెరికా ప్రవేశ నిబంధనలలో డొనాల్డ్ ట్రంప్ సర్కార్ మరో సంచలన నిర్ణయాన్ని తీసుకుంది. గడువు ముగిసినా దేశంలోనే చట్టవిరుద్ధంగా ఉండిపోయే (Visa Overstay) సంస్కృతికి చెక్ పెట్టేందుకు గతంలో ప్రయోగాత్మకంగా ప్రారంభించిన ‘వీసా బాండ్ ప్రోగ్రామ్’ (Visa Bond Program) ను విస్తరిస్తూ శాశ్వత ప్రాతిపదికన అమల్లోకి తెచ్చింది. ఈ మేరకు అమెరికా విదేశాంగ శాఖ అధికారిక ప్రకటన విడుదల చేసింది.
ఆగస్టు 3 నుంచి అమలు.. గరిష్ఠ డిపాజిట్ $20,000
ఈ నూతన నిబంధనలు 2026, ఆగస్టు 3 నుంచి పూర్తిస్థాయిలో అమలుకానున్నాయి. వ్యాపార (B-1), పర్యాటక (B-2) నిమిత్తం తాత్కాలికంగా అమెరికాకు వచ్చే సందర్శకులు ఈ బాండ్ మొత్తాన్ని డిపాజిట్ చేయాల్సి ఉంటుంది.
గతంలో పైలట్ ప్రోగ్రామ్ కింద $5,000, $10,000 మరియు $15,000 డిపాజిట్ ఆప్షన్లు ఉండగా, తాజాగా విడుదల చేసిన తుది నిబంధనల్లో అత్యల్ప మొత్తమైన $5,000 ఆప్షన్‌ను పూర్తిగా తొలగించారు. నూతన విధానంలో బాండ్ మొత్తాన్ని నిబంధనలకు అనుగుణంగా $10,000, $15,000 నుండి గరిష్ఠంగా $20,000 డాలర్లుగా నిర్ణయించారు.
వీసా ఓవర్‌స్టే కట్టడికి ఫలించిన ప్రయోగం
గడువు దాటిన తర్వాత కూడా అమెరికాలో అక్రమంగా నివసించే వారి సంఖ్యను కట్టడి చేయడమే లక్ష్యంగా యుఎస్ ప్రభుత్వం ఈ చర్యలు చేపట్టింది. విదేశాంగ శాఖ గణాంకాల ప్రకారం, పైలట్ విధానాన్ని అమలు చేసిన తర్వాత వీసా నిబంధనలు ఉల్లంఘించి ఓవర్‌స్టే అయ్యే వారి సంఖ్య గణనీయంగా తగ్గిందని అధికారులు గుర్తించారు. అందువల్లనే దీనిని తాత్కాలిక ప్రాజెక్టుగా కాకుండా శాశ్వత విధానంగా మార్చాలని నిర్ణయించారు.
50 దేశాల జాబితా.. భారత్‌కు ఊరట
వీసా ఓవర్‌స్టే రేటు ఎక్కువగా ఉన్న ఆఫ్రికా, ఆసియా మరియు దక్షిణ అమెరికాలోని 50 నిర్దేశిత దేశాల పౌరులకు మాత్రమే ఈ నియమాలు వర్తిస్తాయి. అయితే, ప్రభావిత 50 దేశాల జాబితాలో భారతదేశం పేరు లేకపోవడం భారతీయ ప్రయాణికులకు మరియు నిపుణులకు పెద్ద ఊరటనిచ్చే అంశం.
నిబంధనలు మరియు రీఫండ్ ప్రక్రియ
బాండ్ పరిధిలోకి వచ్చే ప్రయాణికులకు అమెరికా యంత్రాంగం కొన్ని కఠిన నిబంధనలను విధించింది:
- కమర్షియల్ విమానాలు: బాండ్ చెల్లించిన ప్రయాణికులు కేవలం అనుమతించబడిన కమర్షియల్ విమానాల ద్వారా మాత్రమే అమెరికాకు రాకపోకలు సాగించాల్సి ఉంటుంది.
- పూర్తి రీఫండ్: వీసా దరఖాస్తు తిరస్కరణకు గురైనా, లేదా నిర్దేశిత గడువులోగా ప్రయాణం ముగించుకుని స్వదేశానికి తిరిగొచ్చినా డిపాజిట్ చేసిన బాండ్ మొత్తం పూర్తిస్థాయిలో రీఫండ్ అవుతుంది.
- మొత్తం సీజ్: ఒకవేళ వీసా గడువు ముగిసినా అమెరికాలోనే చట్టవిరుద్ధంగా కొనసాగితే సదరు ప్రయాణికుడి బాండ్ మొత్తాన్ని ప్రభుత్వం శాశ్వతంగా ఫ్రీజ్ (జప్తు) చేస్తుంది.
Save as PDF
