మహారాష్ట్రలో దశాబ్దాలుగా సాగిన సాయుధ మావోయిస్టుల ఉద్యమానికి అధికారికంగా తెరపడింది. పోలీసు రికార్డుల ప్రకారం రాష్ట్రంలో ప్రస్తుతం ఒక్క యాక్టివ్ సాయుధ మావోయిస్టు కూడా లేరని మహారాష్ట్ర పోలీసు విభాగం చారిత్రాత్మక ప్రకటన చేసింది. ఒకప్పుడు మావోయిస్టుల కంచుకోటగా ఉన్న గడ్చిరోలి జిల్లాలో మే 2026 నాటికి నక్సల్స్ ప్రాబల్యం పూర్తిగా అంతం కావడంతో ఈ భారీ విజయం సాధ్యమైంది.
ఈ చారిత్రక ఘట్టాన్ని పురస్కరించుకుని ముంబైలో ప్రత్యేక కార్యక్రమాన్ని నిర్వహించారు. ఈ సందర్భంగా యాంటీ-మావోయిస్ట్ ఆపరేషన్లలో కీలక భూమిక పోషించిన ఎలైట్ కమాండో ఫోర్స్ ‘సి-60’ (C-60) వ్యవస్థాపకుడు, మాజీ ఐపీఎస్ అధికారి కేపీ రఘువంశీని రాష్ట్ర ఉన్నత పోలీసు అధికారులు ఘనంగా సత్కరించారు.
1990 డిసెంబర్ 1న గడ్చిరోలి ఎస్పీగా బాధ్యతలు నిర్వర్తిస్తున్న సమయంలో కేపీ రఘువంశీ కేవలం 60 మంది స్థానిక గిరిజన యువకులతో ఈ ‘సి-60’ కమాండో దళాన్ని ప్రారంభించారు. స్థానిక భౌగోళిక పరిస్థితులు, దట్టమైన అడవులపై పట్టుతో పాటు స్థానిక గిరిజన మాండలికాలైన గోండి, మడియా భాషల్లో ప్రావీణ్యం ఉన్న ఈ కమాండోలు వ్యూహాత్మకంగా మావోయిస్టు ఏరివేతలో అద్భుతమైన ఫలితాలను సాధించారు.
నాలుగు దశాబ్దాల పాటు సాగిన ఈ సుదీర్ఘ పోరాటంలో 363 మంది మావోయిస్టులు ఎన్‌కౌంటర్లలో మరణించగా, 558 మందిని పోలీసులు అరెస్టు చేశారు. మరో 861 మంది మావోయిస్టులు హింసా మార్గాన్ని వీడి ఆయుధాలు విడిచిపెట్టి లొంగిపోయి, జనజీవన స్రవంతిలో కలిశారు.
ఈ చారిత్రక విజయం వెనుక భారీ ప్రాణత్యాగాలు కూడా ఉన్నాయి.మావోయిస్టుల హింసాకాండలో మరియు భీకర ఎదురుకాల్పుల్లో అమరులైన 244 మంది పోలీసులు, భద్రతా సిబ్బందితో పాటు 609 మంది అమాయక పౌరుల త్యాగాలను పోలీసు ఉన్నతాధికారులు గౌరవంగా స్మరించుకున్నారు.రాష్ట్ర పోలీసులతో భుజం భుజం కలిపి పోరాడిన సీఆర్‌పీఎఫ్ (CRPF), ఎస్సార్పీఎఫ్ (SRPF) బలగాల సేవలను ఈ సందర్భంగా ప్రత్యేకంగా కొనియాడారు.
Save as PDF
