వరుస లైంగిక దాడులతో ఆందోళన.. నేరం తర్వాత చర్యలతో పాటు ముందస్తు రక్షణ వ్యవస్థలు అవసరం: అనూరాధ రావు
న్యూఢిల్లీ: దేశ రాజధాని ఢిల్లీలో ఇటీవల మైనర్ బాలికలు, బాలుడిపై నమోదైన లైంగిక దాడుల ఘటనలు పిల్లల భద్రతపై తీవ్ర ఆందోళన కలిగిస్తున్నాయని బాలల హక్కుల సంఘం ప్రతినిధి అనూరాధ రావు అన్నారు. నేరం జరిగిన తర్వాత నిందితులను అరెస్టు చేయడం మాత్రమే కాకుండా.. ఇలాంటి ఘటనలు జరగకుండా ముందస్తు భద్రతా చర్యలను మరింత బలోపేతం చేయాల్సిన అవసరం ఉందని పేర్కొన్నారు.
ఇటీవల ఢిల్లీలోని స్వరూప్నగర్లో 16 ఏళ్ల బాలికపై నలుగురు వ్యక్తులు లైంగిక దాడికి పాల్పడి, అనంతరం హత్య చేసినట్లు పోలీసులు తెలిపారు. ఈ కేసులో 19 ఏళ్ల యువకుడితో పాటు ముగ్గురు మైనర్లను అదుపులోకి తీసుకున్నారు. 50కి పైగా సీసీటీవీ కెమెరాల ఫుటేజీని పరిశీలించి టెంపోను గుర్తించిన పోలీసులు నిందితులను పట్టుకున్నారు.
మరో ఘటనలో దక్షిణ ఢిల్లీలోని సీడీఆర్ చౌక్ సమీపంలో కుటుంబంతో కలిసి ఫుట్పాత్పై నిద్రిస్తున్న 10 ఏళ్ల బాలికను క్యాబ్ డ్రైవర్ అపహరించి లైంగిక దాడికి పాల్పడి హత్య చేసినట్లు పోలీసులు ఆరోపించారు. ఈ కేసులో పోలీసులు ఛార్జ్షీట్ దాఖలు చేసినట్లు తాజా సమాచారం వెల్లడించింది.
ఆగస్టు 4న గ్రేటర్ నోయిడా నుంచి ఢిల్లీ కాశ్మీర్ గేట్ వైపు వెళ్తున్న స్లీపర్ బస్సులో 16 ఏళ్ల బాలికపై డ్రైవర్, కండక్టర్ లైంగిక దాడికి పాల్పడ్డారనే ఆరోపణలు నమోదయ్యాయి. ఇద్దరినీ పోలీసులు అరెస్టు చేశారు. ఈ ఘటనపై జాతీయ మానవ హక్కుల కమిషన్ (NHRC) కూడా సుమోటోగా స్పందించి ఢిల్లీ, గౌతమ్ బుద్ధ నగర్ పోలీసు అధికారులకు నోటీసులు జారీ చేసింది.
ఇలాంటి ఘటనలు ప్రజా రవాణా వాహనాలు, ప్రైవేట్ వాహనాల్లోనూ చోటుచేసుకోవడం భద్రతా వ్యవస్థలపై ప్రశ్నలు లేవనెత్తుతోందని అనూరాధ రావు అన్నారు. వాహనాల్లో అత్యవసర అలారం, జీపీఎస్ ఆధారిత SOS వ్యవస్థలు ఏర్పాటు చేసి, ప్రమాద సంకేతం వచ్చిన వెంటనే సమీప పోలీస్ స్టేషన్, పెట్రోలింగ్ వాహనాలకు సమాచారం చేరేలా వ్యవస్థను బలోపేతం చేయాలని సూచించారు.
పిల్లలు ఒంటరిగా ప్రయాణించాల్సిన పరిస్థితుల్లో తల్లిదండ్రులు అప్రమత్తంగా ఉండాలని ఆమె కోరారు. తెలియని ప్రైవేట్ వాహనాలు లేదా అనధికారిక రవాణా మార్గాలను వీలైనంత వరకు నివారించి, ప్రభుత్వ రవాణా, మెట్రో లేదా ధృవీకరించిన క్యాబ్ సేవలను ఉపయోగించడం మంచిదని సూచించారు.
పిల్లలు ప్రయాణించే వాహనం, మార్గం, ప్రదేశం వంటి వివరాలను కుటుంబ సభ్యులతో షేర్ చేసుకునే అలవాటు పెంచాలని అన్నారు. అపరిచితులు లిఫ్ట్ ఇస్తామని పిలిచినా, తినుబండారాలు లేదా ఇతర వస్తువులు ఇస్తామని చెప్పినా జాగ్రత్తగా ఉండాలని పిల్లలకు తల్లిదండ్రులు అవగాహన కల్పించాలని సూచించారు.
స్మార్ట్ఫోన్లో అందుబాటులో ఉన్న SOS, ఎమర్జెన్సీ కాంటాక్ట్ వంటి భద్రతా ఫీచర్లను తల్లిదండ్రులు, పిల్లలు ముందుగానే తెలుసుకుని అవసరమైనప్పుడు వినియోగించుకునేలా శిక్షణ ఇవ్వాలని తెలిపారు. అత్యవసర పరిస్థితుల్లో 112 వంటి అధికారిక అత్యవసర సేవలను సంప్రదించాలని సూచించారు.
స్వరూప్నగర్ కేసులో ముగ్గురు నిందితులు మైనర్లు కావడంతో వారికి ఆటోమేటిక్గా మూడేళ్ల శిక్ష పడుతుందని చెప్పడం సరైంది కాదని న్యాయపరమైన అంశాలను అధికారులు పరిశీలిస్తున్నారు. తాజా సమాచారం ప్రకారం, నేర తీవ్రతను పరిగణనలోకి తీసుకుని వారిని పెద్దలుగా విచారించేందుకు కోర్టును ఆశ్రయించే అంశాన్ని పోలీసులు పరిశీలిస్తున్నారు.
నేరం రుజువైతే సంబంధిత చట్టాల ప్రకారం కఠిన చర్యలు తీసుకోవడంతో పాటు బాధితులకు తక్షణ వైద్యం, మానసిక కౌన్సెలింగ్, న్యాయ సహాయం అందించాలని అనూరాధ రావు అన్నారు. బాధిత కుటుంబాలకు ప్రభుత్వం అవసరమైన సహాయం అందించాలని కోరారు.
పిల్లల భద్రత ఒక్క పోలీసుల బాధ్యత మాత్రమే కాదని, కుటుంబాలు, పాఠశాలలు, రవాణా సంస్థలు, స్థానిక సమాజం, ప్రభుత్వం కలిసి పనిచేయాల్సిన అవసరం ఉందన్నారు. “నేరం జరిగిన తర్వాత స్పందించడం కంటే.. నేరం జరగకుండా ముందే రక్షణ వ్యవస్థలను బలోపేతం చేయాలి” అని అనూరాధ రావు పేర్కొన్నారు.
Save as PDF
