వైద్యవిద్యలో ప్రవేశం కోసం ‘నీట్’ శిక్షణ కోసం ఓ కోచింగ్‌ సెంటరులో చేరిన 17 ఏళ్ల విద్యార్థినిని ఆర్నెల్లపాటు నిర్బంధించి, అత్యాచారానికి పాల్పడ్డ టీచర్లు సిద్దీఖి, వికాస్‌లపై కేసు నమోదు చేసినట్లు ఉత్తరప్రదేశ్‌ కాన్పుర్‌ పోలీసులు వెల్లడించారు. బాధితురాలు కల్యాణ్‌పుర్‌ పోలీసుస్టేషనులో ఫిర్యాదు చేయగా, నిందితులపై అత్యాచారం, అక్రమ నిర్బంధం, పోక్సో నేరాల కింద కేసులు నమోదు చేశారు. 2022 డిసెంబరులో ఫతేపుర్‌ కు చెందిన బాధితురాలు కాన్పుర్‌ కోచింగ్‌ సెంటరులో చేరింది. 2023 కొత్త సంవత్సర వేడుక పేరుతో బయాలజీ టీచర్‌ సాహిల్‌ సిద్దీఖి ఆమెను ఫ్లాటుకు పిలిచి, మత్తుమందు కలిపిన పానీయాన్ని ఇచ్చి, అత్యాచారం చేసి వీడియో తీసినట్లు ఆరోపణలు ఉన్నాయి. ఆ వీడియోతో ఆమెను బెదిరించి, ఆర్నెల్లపాటు మరో టీచర్‌ వికాస్‌ పోర్వాల్‌ సహకారంతో ఆమెపై అత్యాచారానికి పాల్పడ్డాడు. కుటుంబ భయంతో బాధితురాలు అప్పటివరకు మౌనంగా ఉన్నా, కోచింగ్‌ సెంటరులో మరో విద్యార్థిని వేధింపులకు గురిచేస్తున్న వీడియో చూసిన తర్వాత ధైర్యం చేసి పోలీసులకు ఫిర్యాదు చేసింది.
Save as PDF
